Assalamu’alaikum
Wr. Wb.
Bapak Kepala Sekolah ingkang satuhu kinurmatan; Bapak/Ibu
Guru ingkang kula bekteni; rencang-rencang saha adhik-adhik ingkang kula
tresnani.
Puji syukur sumangga kita aturaken dhumateng Gusti ingkang
Maha Agung, ingkang sampun paring rahmat sarta hidayah dhumateng kita sedaya
sahingga saged kempal ing papan punika kanthi wilujeng kangge
ngawontenaken acara perpisahan kelas IX.
Bapak/Ibu Guru ingkang kinurmatan, kula pinangka wakilipun
putra-putri kelas tiga, keparenga kula matur wonten ngarsa panjenengan.
Ingkang sepisan, kula ngaturaken agunging panuwun ingkang
tanpa upami, awit Bapak/Ibu Guru sampun nggula wenthah dhumateng kula sarencang
sadangunipun tigang taun. Sadaya kasaenan Bapak/Ibu Guru mugi-mugi pikantuk
piwales saking Gusti ingkang Maha Agung.
Ingkang kaping kalih, kula nyuwun
pangapunten sadaya kalepatan kula ingkang kasengaja saha boten sak dangunipun
tigang taun punika. Mugi-mugi Bapak/Ibu saha adhik-adhik keparenga paring
pangapunten.
Ingkang kaping tiga, kula sarencang
nyuwun pamit nilaraken pawiyatan punika, saha nyuwun donga pangestu mugi-mugi
kula sarencang kepareng nglajengaken dhumatheng pawiyatan ingkang
kaidham-idhamaken.
Ingkang kaping sakawan, kula tansah ugi
dedonga mugi-mugi Bapak/Ibu saha adhik-adhik tansah pikantuk rahmat saking
Gusti ingkang Maha Agung. Lan saklajengipun pawiyatan punika saya tambah majeng
lan tambah kuncara. Amien…
Kula kinten cekap semanten atur,
kiranging tata krami saha kalepatan basa, kula nyuwun agunging
pangapunten. Billahi
taufiq wal hidayah,
Wassalamu’alaikum
Wr. Wb.
Tidak ada komentar:
Posting Komentar